要成功撲紅館飛　先要問大劉借黑卡？

久唔久有鍾意的歌手在紅館開騷，阿潮都會買飛捧下場，但近呢幾年阿潮發現，演唱會飛一票難求，唔係話你想睇就有，上城市售票網搶到張飛，簡直開心過中六合彩！究竟幾時開始，演唱會飛變成了叱吒飛－連希特拉想買到買唔到？

直到阿潮今朝打開份報紙，見到紅館被人踢爆，呢2年公開賣飛的比例跌到得番4成幾，又話民政局只要求至少2成門票公開發售。真係吹啤啤，紅館最多坐12,500人，公開賣得2成，即2,500張飛，夠你搶定夠我搶啊？

唔怪得連容天后同送禮勤都話「自己都比人cut飛」！搞到大班粉絲因為買唔到飛鬧爆偶像，係咪想「未開騷先辣㷫個場」？

▲ 相片來源：「容祖兒.李克勤 X 紅館 = 9/2015」fb

這些機會不是我的？

買唔到飛除咗歸咎於「雞碎咁少」的公開發售外，內部贊助商「hold飛」都多得佢唔少！

「XX保險」、「XX電訊」留足20行飛比大客，阿潮又不是高富帥，冇白金黃金鑽石之類的信用咭在手，想優先預訂2張飛？下世啦！有次想訂音樂劇飛，佢竟然要AE黑咭，有冇病？係咪要問劉鑾雄借先得？

留唔到飛，去通利門口排隊，原來又係另一個世界！起身食完個早餐先去排？你輸哂啦！天未光已經有幾十個大大隻的南亞裔「排隊黨」在門口守候，仲有紙皮箱、水樽、摺凳用來霸位，你想排前少少？咪妄想！

最諷刺的是，個班「排隊黨」根本唔知開演唱會個歌手係邊個，有人問佢地買咩飛，班友淨係識講：「Popular Singer！Good Singer！」

你問阿潮最後有冇投入過「黃牛叔叔」的懷抱？當然有啦，為咗買飛比BB豬，不惜花上4位數字買飛，交錢個刻好似比人割咗忽肉咁，男人最痛你懂的。

究竟點先買到飛？

其實想撲到飛又唔係話完全冇希望的，除咗黃牛之外，阿潮都仲有幾條屎橋幫到手的。

開賣之後，不妨去各大討論區、放飛區、fb群組進行「地氈式搜索」，有朋友就試過在某某討論區內，見到有「吹神」粉絲割愛原價放飛，你冇睇錯，係原價！

另一條屎橋，以阿潮知道，紅館係有幾十個輪椅位加幾十個看護位，即管試買無妨，「吹神」隻手就一定握唔到㗎啦，但起碼多個機會入場先。

不怕樣衰衰的，加埋入歌手個fans club，肯定有靚飛比你，但好多fans club都要先收100蚊入會費，再加250蚊買件其醜無比的風褸，條數抵唔抵？自行計算啦。

有時候，某啲歌手會同品牌合作，買嘢搭單送演唱會飛，好似N年前「日日飲綠茶」的劉天王開演唱會，阿潮就洗咗成皮嘢係MaBelle買隻鑽戒孝敬阿媽，先拎到2張劉天王「Unforgettable」演唱會飛，呢單嘢都真係幾unforgettable。

最後，如果黑仔到「吹神」連續加開250場，你都係買唔到，就洗出絕招，去女拔撞多幾次囡囡陳康堤同接放學的「肯亞徐」，可能有半張飛比你嘅，執生啦。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。